L’âme insensible – Tristan L’Hermite

Ô Fierté sans exemple ! ô rigueur sans seconde !
À quel mal-heur, ô Dieux, m’auez vous destiné,
Et quel crime ay-ie fait pour me voir condamné
À me plaindre tousiours sans que l’on me responde ?

Aux peines que ie prens ie seme dessus l’onde,
Et flattant les beaux yeux qui m’ont empoisonné
Ie ne puis esmouuoir vn courage obstiné
D’vne amour qui pourroit esbranler tout le Monde.

Pleuray-ie incessamment, on se rit de mes pleurs,
Monstray-ie mes soucis, on les prend pour des fleurs,
Contay-ie mon ardeur, on ne croit point ma flame.

Et lors que i’ay la Terre & les Cieux pour tesmoins,
Qu’auec le plus d’excés on outrage mon ame,
C’est quand on fait semblant qu’on y pense le moins.