Entendit de la ditte obligation – Charles d’Orléans

Intendit. Le nommé Vaillant
Qui fait ceste obligacion
Vous resigne tout son vaillant,
Par simple resignacion
Ne ne fait supplicacion
De guerredon, pour mieulx valoir ;
Fors tout à vostre oppinion,
Soubz le scel de vostre vouloir.
Lequel, d’estoc et de taillant,
Endure mainte passion
D’Amours, qui le vont assaillant ;
Mais soubz dissimulacion,
Porte sa tribulacion,
Faisant semblant de non doloir,
Actendant doulce pension,
Soubz le scel de vostre vouloir.
Pource, ne doit estre faillant
À la renumeracion,
Car, s’il y estoit deffaillant,
Ce serait sa perdicion ;
Et, par Dieu, si bon champion
Ne devez mettre à nonchaloir ;
Si faittes qu’ait provision,
Soubz le scel de vostre vouloir.
J’en parle par compacion,
Mais grant bien lui devez vouloir.
Puis que met son entencion
Soubj le sceau de vostre vouloir.