Vous en pourriez exillier – Christine de Pisan

Vous en pourriez exillier
Un millier
Des amans par vo doulz oeil,
Plains d’esveil,

Qui ont fait maint fretillier
Et veillier.
Je m’en sens plus que ne sueil
Et m’en dueil.

Belle, qui bien traveillier
Et pillier
Savez cuers a vostre vueil,
En recueil
Vous en pourriez exillier.

Mais bien sçavez pou baillier
Et taillier
Moins de joye et plus de dueil
Sur le sueil,
Pour musars entortillier,
Conseillier,
Par vostre attraiant acueil
Sans orgueil
Vous en pourriez exillier.