Poème 133 – Pierre de Ronsard

Vile de Blois, le sejour de Madame,
Le ni des Rois & de ma voulonté,
Ou je suis pris, ou je suis surmonté,
Par un œil brun qui m’outreperce l’ame :

Sus le plus haut de sa divine flame,
Pres de l’honneur, en grave magesté,
Reveremment se sied la chasteté,
Qui tout bon cœur de ses vertus enflame.

Se loge Amour dans tes murs pour jamais,
Et son carquois, & son arc desormais
Pendent en toi, comme autel de sa gloire :

Puisse il toujours sous ses plumes couver
Ton chef roial, & nu toujours laver
Le sien crespu dans l’argent de ton Loire.