Les Secrettes consolations – Tristan L’Hermite

ENCORE que ie pleure, & bien que ie souspire,
Ce n’est pas que mon cœur plaigne sa liberté :
Puis-ie la regretter seruant vne Beauté
Dont les moindres faueurs valent mieux qu’vn Empire ?

Ie despite l’Enuie, & les traits qu’elle tire,
Ma constance & ma foy brauent sa cruauté ;
Et par quelques rigueurs dont ie sois tourmenté,
La Palme glorieuse est iointe à mon martyre.

Quoy que d’vn vieux ialoux l’artifice ait produit,
I’entretiens en secret Orante iour & nuit :
Mais, que sa chasteté n’en soit point offensee.

Ie luy parle sans cesse & la vois en tous lieux,
Car tousiours mon amour fait faire à ma pensee
L’office de ma langue, & celuy de mes yeux.