Le cabaliste – Tristan L’Hermite

ESPRIT qu’on voit briller de clairtez eminentes,
Toy qui de l’Vniuers connois chaque ressort,
Et qui sçais la vertu, la force, & le rapport
Des Cieux, des Elemens, des pierres & des plantes.

Obseruant la Nature aux formes inconstantes,
Tu lis tous les decrets que minute le Sort,
Et peus haster le cours, ou reculer la mort
De tout ce que le Monde a de choses viuantes.

Mais quoy, ne m’apprens rien qui me face enrichir,
Qui me conserue ieune, ou me puisse affranchir,
De la flame, de l’eau, de la peste ou des armes.

S’il faut que mon humeur ait pour toy des appas,
Seulement, cher Timandre, enseigne moy des charmes
Qui m’empeschent d’aimer ce qui ne m’aime pas.