Ballade LXIV – Christine de Pisan

Sages et bons, gracieux et courtois,
Doivent estre par droit tous chevaliers ;
Larges et frans, doulz, paisibles et cois,
4Pour acquerir honneur grans voiagiers,
En fais d’armes entreprenans et fiers
Droit soustenir et deffendre l’Église
D’armes porter doit estre leur mestiers,
8Qui maintenir veult l’ordre a droite guise.

Hanter les cours des princes et des roys,
Les fais des bons recorder voulentiers ;
Estre doivent d’orphelins et de lois
12Et des femmes deffendre coustumiers,
Acompagnier les nobles estrangiers,
Preux et hardiz et sanz recreandise,
Et voir disans, fermes, vrais et entiers,
16Qui maintenir veult l’ordre a droite guise.

Et noblece dont il est si grant voix
Les doit tenir loiaulx et droituriers ;
Pour le renom qu’il est des bons françois
20Leur doit estre tous pesans fais legiers,
Ne orgueilleux, vanteurs ne losengiers
Ne soient pas, car chascun trop desprise
Si fais mahains, bourdeurs ne noveliers,
24Qui maintenir veult l’ordre a droite guise.

Telz chevaliers doit on avoir moult chiers ;
Dieu et les sains et le monde les prise.
Or suive donc toudis si fais sentiers,
28Qui maintenir veult l’ordre a droite guise.