Poème 207 – Pierre de Ronsard

Si blond, si beau, comme est une toison
Qui mon dueil tüe, & mon plaisir renforce,
Ne fut onq l’or, que les toreaus par force,
Au champ de Mars donnerent à Jason.

De ceus qui Tyr ont éleu pour maison,
Si fine soïe en leurs mains ne fut torse:
Ni mousse encor ne revestit écorse
Si tendre qu’elle en la prime saison.
Poil folleton, ou nichent mes liesses,
Puis que pour moi tes compaignons tu laisses,
Je sen ramper l’esperance en mon coeur:

Courage, Amour, deja la vile est prise,
Lors qu’en deus parts, mutine, se devise,
Et qu’une part se vient rendre au vainqueur.