Où le trouvez vous en escript – Charles d’Orléans

Où le trouvez vous en escript?
Se dient à mon cueur mes yeulx,
Que nous ne soyons vers vous tieulx
Que devons, de jour et de nuyt.
Se ne vous conseillon prouffit,
Nous en croirez vous? nennil, Dieux.
Où le trouvez, etc.

Quant rapportons quelque deduit
Que nous avons veu en mains lieux,
Prenez en ce qui vous plaist mieulx,
L’autre lessez, est ce mau dit?
Où le trouvez, etc.