Le Mespris 2 – Tristan L’Hermite

NE te ris plus de mes douleurs,
Perfide sujet de mes pleurs,
Ingrate cause de mes plaintes,
Tu ne fais plus mes desplaisirs,
Mes tristesses, ny mes souspirs ;
Tu ne me donnes plus d’attaintes,
Et pour toy ie n’ay plus de craintes,
D’esperances, ny de desirs.

Mon esprit abhorre ta loy ;
Tu m’as trop engagé ta foy,
Et me l’as trop souuent faussée :
Ie seray sage à l’auenir ;
Ma peine commence à finir,
Toute mon ardeur est passée,
Et ie deffends à ma pensée,
De m’en faire plus souuenir.
Ie pourrois auecque raison
Punir ta lasche trahizon,
Et te noircir d’vn iuste blasme :
Mais ie commence à negliger
Le soin de te desobliger ;
Car cét obiect est trop infame
Pour n’effacer pas de mon ame
La volonté de me vanger.

Pensers, mon aimable entretien,
Ne me representez plus rien
Des charmes de cette cruelle :
Ne me venez point abuser,
Ne me venez point excuser
Les defauts de cette infidelle,
Et ne me parlez iamais d’elle
Si ce n’est pour la mespriser.