L’Agonie mortelle – Tristan L’Hermite

ACHEVE moy de grace ô belle fugitiue,
Adouçis par vn meurtre vn pire traitement,
Pourquoy veux tu si fort haster ton partement ;
N’aprehende tu point que mon ombre te suiue ?

Tu me quittes, barbare, & tu faits la craintiue
D’vn sujet que ta haine enuoye au monument ;
Tu faits la pitoyables & tu veux que ie viue
Apres m’auoir cent fois blessé mortellement.

Dieux, inspirez quelqu’vn qui parle à la Iustice :
Le crime est euident, il faut qu’on la punisse ;
Ainsi que mon trespas, le sien est resolu.

Mais la poursuitte est vaine, & l’ingrate me braue,
Car elle sçait fort bien qu’vn Tyran absolu
N’est iamais recherché de la mort d’vn Esclaue.