Appréhension d’un départ – Tristan L’Hermite

ON me vient d’auertir que tu t’en vas d’icy
Iris diuin obiect dont mon Ame est rauie,
Qu’vne Ayeule est malade, & qu’vn pieux soucy
À te rendre auprés d’elle auiourd’huy te conuie.

Peux tu bien consentir à me laisser ainsi ?
S’il faut que ce départ soit selon ton enuie,
Comme il est resolu mon trespas l’est außi,
Et le mal de l’absence acheuera ma vie.

Quoy tu ne me dis rien dans ces extremitez ?
Ah ! par ceste froideur mes iours sont limitez,
Adieu donc, ô Beauté d’insensible courage ;

Puis que ma paßion ne t’en peut diuertir,
Nous ferons à mesme heure vn different voyage,
Mon Ame est comme toy toute preste à partir.