Poème 148 – Pierre de Ronsard

Une diverse amoureuse langueur,
Sans se meurir dans mon ame verdoie :
Dedans mes yeus une fontaine ondoie,
Un Montgibel s’enflame dans mon coeur.

L’un de son feu, l’autre de sa liqueur,
Ore me gele, & ore me foudroie,
Et l’un & l’autre à son tour me guerroie,
Sans que l’un soit dessus l’autre vainqueur.

Fais, Amour, fai qu’un des deus ait la place,
Ou le seul feu, ou bien la seule glace,
Et par l’un d’eus mets fin à ce debat :

J’ai, seigneur, j’ai, j’ai de mourir envie,
Mais deus venins n’etouffent la vie,
Tandis que l’un à l’autre se combat.