La belle captive – Tristan L’Hermite

PAR vn sort dont les cruautez
Affligent toutes les Beautez
Qui meritent d’estre adorées ;
Tousiours les femmes comme vous,
Ainsi que les Pommes dorées
Ont leurs Dragons & leurs jaloux.

Mais on a beau vous esclairer,
Ie pourray tousiours esperer
Assez d’heur dans ma seruitude ;
Puisque vostre inclination
N’a point d’excés d’ingratitude
Pour l’excés de ma paßion.
Bien que nos corps soient attachez
Et tous nos plaisirs empeschez
Par cette cruelle manie :
Amour Roy de nos libertez,
Ne veut pas que sa tyrannie
S’estende sur nos volontez.

Malgré ces inhumaines loix
Qui de la veuë & de la voix
Nous veulent empescher l’vsage ;
Moquons nous de cette rigueur,
N’obeissons que du visage
Et soyons rebelles de cœur.

Ne pouuons nous pas nous aimer
Sans esclat, & sans alarmer
Toutes ces Ames insensées ;
Et trouuer assez de loisir
Pour faire parler nos pensées,
Et nous voir des yeux du desir ?