Les tourments – Tristan L’Hermite

QUE ie trouuve de gloire & d’heur en ma disgrace !
Quelque secret ennuy qui m’outrage si fort,
De quelque empeschement dont m’afflige le Sort,
Et de quelque rigueur dont Philis me menace.

Encore que mes feux ne fondent point sa glace,
Mourant pour son sujet, i’auray ce reconfort
Qu’il sera mal-aisé qu’vne plus belle mort
Puisse iamais punir vne plus belle audace.

Pour le moins ma meurtriere a mille qualitez,
Elle a mille vertus, elle a mille beautez,
Et mille doux appas dont la force est extréme.

On l’estime à son teint la Courriere du iour,
Quand on l’entend parler, c’est Minerue elle mesme,
Et lors qu’elle sousrit, c’est la Mere d’Amour.