L’Absence ennuyeuse – Tristan L’Hermite

QVE le mal de l’absence est cruel aux Amans !
Et qu’il rend mon humeur melancolique & noire !
Pour moderer mes maux ou mes ressentimens :
Dieux, rendez moy Phillis, ou m’ostez la memoire.

Les obiects les plus doux me sont des monumens
Depuis que ceste Belle a repaßé la Loire ;
Et i’esprouue depuis de si cruels tourmens,
Que sans les ressentir, on ne les sçauroit croire.

I’esperois en voyant ce bel Astre d’Amour,
Qu’à iamais sa clarté me donneroit le iour :
Mais elle est à mes yeux pour long temps éclipsée :

Et i’apprehende bien d’auoir vn Sort pareil
Au sort des habitans de ceste Mer glacee
Qui demeure six mois sans reuoir le Soleil.