Immitation de l’Ode latine de Jan Dorat – Joachim Du Bellay

Comme en un char, qui bruloit,
Raui parmi l’air liquide
Le grand prophete voloit,
Et commandant à la bride
Des cheuaux audacieux,
D’vne main etincelante
Guidoit leur trace brulante
Par la carriere des cieux.
Quand du vieil seing foudroyant,
Aux braz du ieune prophete
La robɇ en l’air ondoyant
Tomba d’vne longue traite,
Qui sembloit aux regardans
Etinceler par derriere
Vne brillante lumiere
A pointes de traiz ardens.
Commɇ au serein d’vne nuit
De mile feux couronnée
De loing quelquefois treluit
Vnɇ étoilɇ epoinçonnée,
Qui coulɇ, ou semble couler,
Et trainant apres sa fuite
De sillons vne grand’ suite
Court par la vague de l’air.
Ainsi, ayant depouillé
De sa forme corporelle
Le manteau iadis souillé
D’vne tache naturelle,
Marguerite delaissa
Ce vieil fardeau tant moleste,
Et aux ronds du feu celeste
Plus alaigre se haulsa.
L’esprit du corps deuoilé,
Et net des terrestres boües
Iusque au ciel étoilé
Vola dessus quatre roües :
La foy, l’esperancɇ außi,
La charité tant prisée,
Et celle, que n’a brisée
L’effort du cruel souci.
Sur ces couples bien appris
Parmi la celeste trace
Au ranc des heureux espris
Ellɇ alla prendre sa place,
La, ou Roinɇ elle se void
D’vn monde plus grand, & ferme
Que n’etoit le petit terme,
Que son Nauarrois auoit.