Description de la Corne d’Abondance – Joachim Du Bellay

Acheloys cet amoureux fleuue,
Se faisant Taureau mugissant,
Contrɇ Herculɇ au cõbat se treuue,
Mais à son dam il fist epreuue
De l’ennemy le plus puissant.
De cornes sa testɇ embellie
De l’vne eut le front desarmé.
Les Naiades l’ont recuillie,
Et des plus beaux thesors remplie,
Dont le cours de l’an soit semé.
La sont les vermeillettes roses,
Des lys la royalle blancheur,
La les oeillez, la sont encloses
Mile marguerites decloses
A la matinal frescheur.
Le est la pomme colorée,
La est le citron verdissant,
La l’oliue tant honnorée,
La l’orange iaune dorée,
La le beau grenad rougissant.
La riche pommɇ enluminée,
Prix de la plus belle des trois,
De ce Cor soit exterminée.
Trop dure fut sa destinée,
Qui fut la mort de tant de Rois.
Celles, par qui la Cyprienne
D’Atalante tarda le cours,
Soient dedans cete corne mienne,
Et facɇ Amour, qu’il m’en auienne
Contre vous semblable secours.
Ces fleurs ie voiiɇ à la plus belle.
Mon oeil la void, mon coeur la sent :
Mais ie ne diray le nom d’elle,
Chacune se peult iuger telle,
Puis qu’à toutes i’en fay present.
De milɇ autres icy cachées
Les champs de Cypre sont fourniz.
Pour vous y furent arrachées
Celles, qui sont du sang tachées
D’Hyacint’, Narcissɇ, Adonis.
Venus, qui congnoist voz merites,
En son verger les fist cuillir
Par les mains de ses trois Carites :
Ses faueurs ne sont pas petites,
Veillez en gré les recuillir.
La riche corne florissante
Ie la comparɇ à voz valeurs.
La fleur des ans est perissante,
Et puis la saison rauissante
Palist les vermeilles couleurs.
Les fruitz, qui les beautez nourissent,
Ne laissez en l’arbre seicher.
Cuillir les fault, quãd ilz meurissent,
Außi sans meurir ilə flétrissent,
S’on les veult trop verds arracher.